Sesión vermú
Comezaremos coa tradicional sesión vermú (ou beermú) coa presentación das cervexas oficiais do Festival: a “27373”, unha cervexa de trigo con laranxa e coriandro, moi refrescante e moi axeitada para o vrao e a “CastiñeirIPA”, unha cervexa amarga de 5 graos ben cargadiña de lúpulo e lima, ámbalas dúas cervexas son posibles grazas á colaboración dos nosos amigos de Cervexa Artesá Aloumiña. E como non pode haber unha sesión vermú de verdade sen música tradicional, teremos a honra de ter con nós ao Cuarteto Seimeira, seguramente unha das agrupacións co mellor dúo de gaiteiros do país, con iso xa o dicimos todo.
Festival de día
Pola tarde haberá o tradicional Aberto de Billarda, un dos abertos con máis tradición dos festivais galegos e un dos mellores pola beleza do entorno, por un campo de xogo inmellorable, uns premios feitos a man preciosérrimos e porque a billarda está no medio e medio do festival. Anotación no propio festival ata media hora antes de que empece o xogo.
E despois da billarda, o cun éxito inesperado, teremos unha nova edición do Campionato de serradoras da Terra Cha, con emoción, enerxía e uns bos premios
E para rematar a parte do festival máis familiar, pecharemos con Pakolas. Paco Cerdeiras é un vello coñecido do festival, pois xa estivo con Zënzar, hai xa uns anos. Mais, desta vez, volve ao noso festival, no formato rockeiro para crianzas, con “Rockeando con Ramona pequena” un espectáculo cheo de enerxía e boa música dirixido ao público familiar. ¡¡Imos mover o esqueleto a ritmo de rock!!
Festival de noite
A partir das nove e media aproximadamente, comezará o Festival de noite con tres grupos de moi diferentes estilos, pero todos coa enerxía da nosa lingua como fío condutor.
Pauliña
A encargada de abrir os concertos vai ser Pauliña. Paula Chaves é unhas das voces femininas con máis carácter e personalidade de hoxe en día. Colaborou con algún dos grupos que xa pasaron polo festival como Ruxe-Ruxe ou os mesmos Zënzar. Con tres discos publicados, De-xeneración (2018), A Malfalada (2020) e Testemuñas (2021) pode ser un deses concertos que deixe pegada no festival. O seu potente directo, mestura country, folk, rock e blues, sen dúbida, a presenza feminina do festival vai dar moito que falar.
Pepe Vaamonde grupo
Ao longo destas once edicións do Festival27373, sempre intentamos que a música tradicional estivese presente e tamén que algún dos grupos fose de preto. Nesta ocasión o Pepe Vaamonde Grupo cumpre ámbalas dúas condicións. Formado no ano 2001, o grupo é unha das referencias no panorama folk galego, polas súas coidadas composicións, arranxos impecables e unha posta en escena exquisita. Teñen publicados catro traballos discográficos; Aviouga (2002), Onde nace o vento (2005), Introterra (2010) e Nas pedras do lar (2015). Un dos gaiteiros de referencia deste país, pisa por primeira vez o torreiro do festival, ¿quen se atreve a sacar punto?
Tecor Societário
Os que sodes habituais do Festival27373 sabedes que nos presta rematar o día con música potente e cañeira. Este ano rematan a undécima edición, os Tecor Societário. Grupo formado por músicos moi experimentados que estiveron en grupos referenciais da música galega e que son quen de misturar a ledicia contaxiosa da música tradicional coa enerxía e a raiba do rock. Punk-folk con moita forza, letras reivindicativas e un directo bestial, para rematar esta undécima edición.
A compañía de Teatro de Marionetas Trécola naceu como compañía no ano 1981 fundada por Fernanda Cabrera, unha das persoas máis influíntes na recuperación dos monicreques na escena galega. Trala súa morte, o seu fillo tomou o relevo da compañía que hoxe dirixe xunto a Isabel García Coldeira. Un dos fins da compañía é darlle a categoría artística que merecen os títeres como ferramenta dentro da dramaturxia. Na actualidade está afincada na localidade lucense de Pol e é unha vella coñecida para Castiñeiro Milenario, pois trouxo a Begonte un bo feixe das súas obras.
A música máis tradicional vai estar representada este ano por un grupo de mozas que chegan desde o concello de Mos. Un dos grupos de cantareiras máis interesantes dentro do panorama tradicional que xurdiu no 2007, co obxectivo principal de compilar, conservar e divulgar as músicas, cantos, instrumentos e vestiario tradicional galego. Desde o ano 2010 son a Asociación Cultural Folclórica As Lagharteiras. No 2016 presentaron o seu primeiro disco, titulado igual que o nome do grupo.
Un dos grupos “locais” desta edición de 2019 xa que teñen o seu local de ensaio en Illoi, preto de Saavedra. Filophóbicas é un trío de punk-rock, de letras reivindicativas e cun directo festeiro e potente. Formado no ano 2016 os tres compoñentes son Fran López (Voz e guitarra);Nando Brocos (Guitarra e coros) e Bubi Vidal (Percusión e coros).
Énchenos de orgullo e satisfazón presenta o que posivelmente seja o único grupo do mundo que fai monarco-punk. Unha vaga de punk, retranca, humor políticamnete incorrecto e unha chea de adxectivos máis que lle poderiamos poñer, mais o verdadeiramente importante é a súa música, a súa actitude e a súa presenza, por primeira vez, o exército froilanista chega a unha das cidades claves de todo o seu movemento, por algo Froilán é I de Begonte.
Festival 27373 