Vídeo resumo da actuación do contacontos Anxo Moure e o seu Carballo con botas, unha actuación que deixou aos nenos e nenas tan abraiados como nas fotos que podedes ver no seguinte vídeo.
Tamén podes ver tódalas fotos no noso álbum do Carballo con botas en Flickr.
O sábado pola mañá, Teatro do miolo tivo o honor de abrir a I edición do Festival 27373. Dous científicos “tolos” conseguiron atraer a atención dos máis cativos.
Podedes disfrutar das fotos do seu obradoiro.
Podes velas tamén no álbum Ciencia Entretida en Flickr.
Para rematar o Festival nada mellor que facelo coa descarga musical e ideolóxica de Avante! Descarga musical, porque no escenario estes catro mozos son unha forza desatada da natureza, e descarga ideolóxica, polo compromiso que teñen coa lingua e co país. Mais, case é mellor que se definan eles mesmos: “Os Avante! somos rock coletivo e com orgulho de classe que mistura realidade e sentimento para dar forma musical a um sonho de liberdade. Com um marcado compromisso de aposta polo monolingüismo social, Avante! nasce para somar mais um contributo à socializaçom e naturalizaçom da língua que nos é própria. As nossas letras som um reflexo das nossas emoçons e do nosso compromisso para com as causas legitimas do nosso povo enquanto a nossa música é espelho das influências musicais com as que crescemos”
Avante! está formado por Alberto Pombo na voz e na guitarra solista, Diego Bernal na guitarra rítmica, Rubém N. ‘Kako’ no baixo e Iago da Torre na bateria. No 2010 publicaron unha maqueta, titulada Galiza Metal que podes descargar aquí.
Para facerte unha idea do que fan Avante!, podes ver os seguintes vídeos: Semente de vida e Galiza Metal
Despois da actuación de Guezos, teremos con nós a un trío inclasificable, que se basean na raíz do tradicional, que teñen a xenreira do punk, a modernidade do rap, a gañas de trocar o mundo da música dos cantautores, en definitiva, música de guerrilla ou como eles mesmos din: foliada rap’n’punk.
O proxecto dos Labregos nace no ano 2007, e estaba formado por Leo, coñecido polo seu proxecto persoal de Leo i Arremecaghona, O García, coñecido por ser o MC do grupo Dios ke te crew e Vero, percusionista dos míticos Xenreira. Na recente actualidade, Lydia , ex-batería de Skarallaos, sustituíu a Vero na batería. Por certo que, esta actuación no Festival 27373 vai ser a primeira actuación no novo trío, é dicir, esta será unha desas actuacións históricas que ninguén se pode perder…
Para que vexades a proposta musical dos Labreg@s non perdades os seguintes vídeos interpretando Estarei ou esa versión punk da Cantiga para unha Antroidada
O Carballo con botas é unha árbore moi especial, nos contan en O Averiguadeiro como naceu. “Querco, habitante da fraga dos contos pequenos, ficaba triste, só, soíño de todo. Todas a súas amigas, as outras árbores, arderan nun terrible incendio. No outono Querco chorou, as súas bágoas con forma de belotas caeron dentro dunha bota vella que alguén esquecera no bosque e o vento enchera de terra. No inverno choveu e choveu e non parou de chover enriba da bota, a terra e a belota. Na primavera dentro da bota unha árbore naceu, foi chamada o carballo con botas e dende aquel entón fixo compaña a Querco, partindo de cando en vez a outros bosques e lugares por saber de novos contos que contarlle ó Querco, inzando a súa fraga de fermosos contos pequenos“.
En realidade, o Carballo con botas é Anxo Moure, chantadino de nacemento, cidadán do mundo de adopción. Incansable na súa angueira de concienciar, de ensinar, de defender a Natureza. Incansable na multitude de proxectos que leva a cabo: Bicis pola paz, Papaventos, Xevale, Contos solidarios. Anxo é, como dicía Bertolt Brecht, un deses homes que loitan toda a vida, un home imprescindible, nun país no que hai tantos prescindibles…
Quedamos cun anaquiño dunha das súas actuacións na Semana do libro de Lugo.
O Festival de noite comezará ás 22:30 coa actuación do grupo ourensán Guezos. O nome do grupo provén do barallete, xerga dos afiadores ourensáns, e significa rapaces.
Así que, estes rapaces no ano 1999, deciden montar un grupo que, nos primeiros tempos facían unha música máis preta ao tradicional. Pouco a pouco o grupo, sen perder as raíces, vai virando cara o folk, e nos últimos traballos hai claras influencias do rock, do pop, e mesmo de estilos tan afastados como o reggae ou o ska. Como eles mesmos afirman: “Non nos importa o estilo,a sonoridade ou corrente musical, o noso obxectivo final é facer boas CANCIÓNS“.
Sempre involucrados na autoxestión e na filosofía da difusión libre dos seus traballos, os Guezos teñen publicados catro traballos.
En 2001 publican o seu primeiro traballo, titulado como o propio nome do grupo, que primeiro veu a luz como maqueta, para posteriormente ser editado como disco. No ano 2004 e despois dalgúns trocos na formación publican o segundo traballo titulado Terradentro. No 2007 publican unha especie de recompliación, con algúns temas gravados ao vivo, titulado 99-06 e que podes descargar (licenza Creative Commons) da páxina de A Regueifa nesta ligazón: Guezos 99-06. No 2009 publican Oito destinos que fai referencia aos oito integrantes do grupo, peor tamén aos temas, composicións musicais que saben onde empezan pero non van rematar. De novo o disco pódese descargar grazas á súa licenza Creative Commons na seguinte ligazón: Oito destinos de A Regueifa. No 2011 veñen de publicar o que ata o de agora é o seu último traballo, O histérico latexo, como din os de Planeta Furancho: “Pingas de todas as cores. Luminosos e comprometidos. Mestura total e con toda a calidade que a banda leva por bandeira nos seus directos. O histérico latexo leva aos Guezos de viaxe polo mundo. De dentro para fóra. Dende o centro do corazón. Música da de verdade. Música de aquí”
Se non estamos errados, os membros actuais de Guezos son: Anxo Fernández, teclado, acordeón e voz; Adrián Beiroa, voz e guitarra acústica; Roberto Reboiro, baixo eléctrico; David Quintás, guitarra eléctrica; Francisco Díaz, batería; Xabier Domínguez “Morta” e Modesto Cid “Nes”, gaita e whistle.
Para rematar unhas mostras da súa música e do seu directo, un anaco de música para que vexades o que non vos podedes perder no Festival 27373:
O sábado 21 de xullo abrimos o Festival 27373 cunha actuación para os nenos e nenas. A partires das 11:30, a compañía Teatro do Miolo encargarase de facer entretida a Ciencia. ¿E como fan para conseguir este marabilloso obxectivo?
Pois sinxelo, nas súas propias palabras, isto é Ciencia entretida:
“Obradoiro educativo ideado para ensinar ciencia dunha forma lúdica a nen@s menores de 12 anos. Unha proposta con moita «química» para divertirse coa maxia da ciencia.
Descrición do obradoiro
Caracterización dos nen@s con elementos de vestiario para o inicio da actividade. Os participantes guiados por dous científicos moi especiais, realizarán distintos experimentos divertidos e espectaculares. Aprenderán xogando nocións sobre disciplinas científicas.
Obxetivos
Fomentar a motivación, autoestima e integración dos nen@s, espertar a súa curiosidade e imaxinación dunha forma educativa e entretida, potenciar a curiosidade científica, asi como adquirir diversas nocións científicas“.
Para que vexades unha mostra do que vos perderedes se non acudides ao Festival 27373, deixámosvos cun vídeo:
O Festival 27373 que organiza a Asociación Cultural Castiñeiro Milenario é un evento que intenta mesturar un festival para nenos e nenas e un festival para os maiores. Deste xeito, a programación terá en conta aos máis miúdos polo día, con actividades para eles, como os divertidos obradoiros de Ciencia Entretida, contacontos, atraccións con inchables, festa da escuma …E pola noite será a mocidade, e os pais dos miúdos, os que poidan gozar dun Festival de música, con tres grupos ben distintos pero coa raíz común de facer moi boa música en galego. Así que, coa chegada da noite, Guezos, Labregos do tempo dos Sputniks e Avante vannos a poñer a bailar a todos ata ben entrada a madrugada.
Toda a información que vaia xurdindo sobre o Festival 27373 irá aparecendo nestas páxinas, e nas pestanas superiores do blogue irá aparecendo a programación completa do festival, información sobre os grupos, como chegar ata o lugar do Festival no Club Fluvial de Begonte, ou poñerte en contacto con nós.
Se queres estar ao día de todo o que vai pasar no Festival, xa estás tardando en engadir esta páxina aos teus marcadores e difundila entre os teus contactos.
Festival 27373 