Hemeroteca: Entrevista en Voces de Lugo

Aquí podedes escoitar a entrevista que nos fixo Félix Jorquera no programa Voces de Lugo para falar do Festival 27373.

Festival de noite 2014: Ruxe-Ruxe

Rematamos o percorrido por tódalas actividades que tivemos no Festival 27373 co grupo que pechou a noite de concertos: Ruxe-Ruxe.

Antes de deixarvos coas fotos e o vídeo, aclarar que, por problemas na gravación, o son do vídeo de Ruxe-Ruxe non é o orixinal do concerto de Begonte e fixemos unha montaxe coas imaxes do 27373 e o son doutro directo atopado pola rede, así que pedimos desculpas por este inconvinte.

Máis fotos no álbum Festival de noite 2014 en Flickr

Advertisement

Festival de noite 2014: Tiruleque

Fotos e vídeo da actuación de Tiruleque que, simplemente, fixeron un concerto espectacular.

Interpretando “A Laranxa”.

Máis fotos no álbum Festival de noite 2014 en Flickr

Festival de noite 2014: Milesios

Milesios Música Celta, visitantes asiduos doutras edicións, tocoulles este ano estar aí arriba e ser os encargados de abrir esta edición de 2014.

Máis fotos no álbum Festival de noite 2014 en Flickr

O Festival de día 2014

Despois da sesión vermú, por certo, moi ben regada con cervexa artesá Aloumiña, chegou o momento dos paseos en kaiak polo río Ladra grazas ao infatigable traballo de Non Estreses, dos xantares comunitarios, das sobremesas alongadas e das actuacións e actos que tiñamos pola tarde.
Comezaron Branca e Pablo co seu obradoiro para nenos e nenas (e algún maior que se apuntou) que tivo un éxito rotundo, pois pouco a pouco se foi achegando rapazada ata lograr unha máis que respectada e respectable audiencia. No obradoiro fixeron un percorrido por esoutros instrumentos pouco coñecidos ou dos chamados pobres e conseguiron atraer a atención do público ante a variedade de cousas coas que se pode facer música ou acompañala. Remataron poñendo en práctica algunhas desas cousiñas que se foron vendo no obradoiro.

Case sen tempo de espera, comezou o espectáculo de Peter Punk, que agradou ás crianzas e encantou aos maiores con ese humor entre inocente e salvaxe que non deixa indiferente a ninguén e que conseguiu arrancar risas e aplausos a unha audiencia entregada.

Para rematar a xornada de día, nada que mellor que facelo co deporte nacional, no II Aberto de Billarda do 27373, este ano nun campo grande e nun entorno case idílico e que rexistrou unha presenza masiva de palanadores e algunha que outra valente palanadora todo baixo a atenta supervisión dos rapaces da Liga Nacional de Billarda (LNB).
Como mostra unhas fotos e un cachiño da actuación de Peter Punk.

Todas as fotos pódense ver no álbum Festival de día en Flickr.
Peter Punk facendo equilibrios chungos que te cagas…

Grazas a Fina polo traballo de reporteira durante toda a xornada.

Sesión vermú

O día comezara un pouco gris e tristeiro, incluso, ameazaba con chover…ata que chegou a enerxía revitalizante de Bloquinho de Xermolos e coa súa forza, espantou os nubeiros e achegou a ledicia. Un pracer contar con eles nesta sesión vermú. E sen tempo para que as nubes volveran, Cans de palleiro botaron ao lonxe o mal tempo coa súa música tradicional.
¡¡A forza da música contra as inclemencias!!

Un pequeno resumo da actuación de Bloquinho de Xermolos no 27373

Todas as fotos pódense ver no álbum Festival de día en Flickr

Isabel Risco e Zënzar

Isabel Risco no Festival 27373, presentando de xeito único e irrepetible aos Zënzar e aproveita para falar da Liga Nacional de Billarda (LNB) do Castiñeiro Milenario, de Almanzor e do que faga falta. Remata o vídeo cun cachiño da actuación de Zénzar con Carlos Gende, mais as cousas da tecnoloxía é o que teñen e se se acaba o espazo na tarxeta, non se pode seguir gravando, unha mágoa.

A das festas con Guezos no II Festival 27373

Temazo para bailar e saltar este “A das festas” dos Guezos.

Nota de Castiñeiro Milenario: pedimos desculpas polo malo son do vídeo, a gravación orixinal nosa non da para moito máis (a pesares de traballar sobre ela un montón de tempo non hai maneira de arranxar un son deficiente de partida), pero pensamos que, a pesares disto, tiñamos que subilo de igual xeito.

Valseando con Os Minhotos

Unha das cancións máis fermosas do noso abondoso repertorio tradicional é O Valse do Miro e Os Minhotos interpretarono na noite do Festival 27373.

Bailando con Branca Villares

A pesares de anuncialo como obradoiro de percusión, a idea era a de facer xogos musicais e rítmicos cos nenos e nenas que se achegaran pola tarde, e de non haber pequenos facer algo cos máis maiores. Sabemos que iso provocou certos malos entendidos e que a pobre Branca o pasara un pouco mal con este obradoiro, pero ao final e a pesares do pouco tempo que tivo, foi quen de coller un grupiño e poñelo a bailar e cantar, moi ben apoiada por eses músicos “espontáneos”.