Festival 27373

Festival de música en galego de Begonte


Deixar un comentario

Festival de noite 2019

Comezamos a contarvos as actuacións que van ter lugar no Festival de noite 2019.

Teatro de Marionetas Trécola

A compañía de Teatro de Marionetas Trécola naceu como compañía no ano 1981 fundada por Fernanda Cabrera, unha das persoas máis influíntes na recuperación dos monicreques na escena galega. Trala súa morte, o seu fillo tomou o relevo da compañía que hoxe dirixe xunto a Isabel García Coldeira. Un dos fins da compañía é darlle a categoría artística que merecen os títeres como ferramenta dentro da dramaturxia. Na actualidade está afincada na localidade lucense de Pol e é unha vella coñecida para Castiñeiro Milenario, pois trouxo a Begonte un bo feixe das súas obras.
Para o Festival 27373 van traer a súa obra “Tolitates”. Un espectáculo de pequeno formato baseado na personaxe de Tolitates que movido por unha atracción, se cadra, máis tola que el, sáltase todas os sinais de perigo e escapa da cordura, sen pensar que sempre pode haber alguén máis transgresor que el. Un persoeiro que irá atopando situacións e personaxes absurdos que van loitar polo protagonismo nas táboas do escenario. Diferentes técnicas acompañan o espectáculo, como monicreques con fíos, obxectos, bunraku ou guiñol. Un espectáculo dirixido a un público infantil e familiar.
Esta actuación de Marionetas Trécola chega grazas á colaboración do Concello de Begonte co Festival 27373.

Lagharteiras

A música máis tradicional vai estar representada este ano por un grupo de mozas que chegan desde o concello de Mos. Un dos grupos de cantareiras máis interesantes dentro do panorama tradicional que xurdiu no 2007, co obxectivo principal de compilar, conservar e divulgar as músicas, cantos, instrumentos e vestiario tradicional galego. Desde o ano 2010 son a Asociación Cultural Folclórica As Lagharteiras. No 2016 presentaron o seu primeiro disco, titulado igual que o nome do grupo.
Gañadoras de multitude de premios tanto polo seu bo facer cantando como polos marabillosos traxes tradicionais que locen como podedes ver no seguinte vídeo e que teremos a sorte de poder gozar en directo no Festival 27373. As Lagharteiras no LUAR, Riscada e maneo de Anxeriz.

Filophóbicas

Un dos grupos “locais” desta edición de 2019 xa que teñen o seu local de ensaio en Illoi, preto de Saavedra. Filophóbicas é un trío de punk-rock, de letras reivindicativas e cun directo festeiro e potente. Formado no ano 2016 os tres compoñentes son Fran López (Voz e guitarra);Nando Brocos (Guitarra e coros) e Bubi Vidal (Percusión e coros).
Teñen unha maqueta gravada que podes escoitar íntegra no seguinte vídeo.

O Puto Coro do Exército Froilanista

Énchenos de orgullo e satisfazón presenta o que posivelmente seja o único grupo do mundo que fai monarco-punk. Unha vaga de punk, retranca, humor políticamnete incorrecto e unha chea de adxectivos máis que lle poderiamos poñer, mais o verdadeiramente importante é a súa música, a súa actitude e a súa presenza, por primeira vez, o exército froilanista chega a unha das cidades claves de todo o seu movemento, por algo Froilán é I de Begonte.

Gora Froilán by O Puto Coro do Exército Froilanista from Partido Froilanista on Vimeo.


1 comentario

Festival de noite 2018

Comezamos a contarvos as actuacións que van ter lugar no Festival de noite 2018.

Migallas

A compañía pontevedresa Migallas Teatro foi constituída como compañía profesional no ano 1996 aínda que como grupo afeccionado a súa creación data de 1992. Os seus espectáculos teñen un carácter humorístico e están baseados na visión irónica da realidade máis próxima, facendo un teatro comprensible, crítico e divertido sen descoidar, como é obvio, a interpretación e a posta en escena. Migallas Teatro ten na actualidade espectáculos para público familiar e espectáculos para público adulto e dende o ano 1996 teñen realizado unha media de 70 representacións por ano o que suma unhas 500 actuacións como compañía profesional. Ademais da montaxe de espectáculos teatrais e de contacontos realizan talleres de expresión dramática a través de concellos, asociacións e colexios. Na cidade de Pontevedra coordinan desde hai máis de 6 anos os obradoiros de expresión dramática dirixidos a rapaces e rapazas de entre 4 e 14 anos que desenvolve o Concello daquela localidade.
Para o Festival 27373 van traer a súa obra “Merenda con pan de millo”. Un espectáculo de pequeno formato baseado no Libro-disco Pan de millo, editado pola Editorial Kalandraka e coa produción musical a cargo de Paulo Nogueira e Magoia Bodega, do grupo Treixadura. Nel combínanse cancións e narración oral, co proceso de elaboración do pan de millo como fío condutor. Os temas musicais que se interpretan son: “Pinocho”, “Pan de millo”, “O piollo e a pulga”, “Unha vella tiña un can”, “Que cousa, cousiña é?” e “Miña “Abuela Manuela”. A música está gravada (toca unha banda de pulgas) mais as voces solistas son en vivo.

Esta actuación de Migallas chega grazas á colaboración do Concello de Begonte co Festival 27373.

Os Carecos

A música máis tradicional vai estar representada este ano por un grupo de rapaces que chegan dende a zona de Ortegal, un dos grupos máis interesantes dentro do panorama tradicional, un grupo de cantareiros e pandereteiros co único obxectivo de amosar a súa paixón polo folclore galego e a nosa música. Os carecos son Samuel Ramos, Diego e Cristovo Chao, Carlos e Javi Cheda. Pero ademais, Os Carecos teñen unha forte compromiso solidario e organizan en setembro o Serán Careco Solidario, un evento para recadar fondos para asociacións relacionadas con enferm@s de cancro, unha enfermidade que por desgraza, tocoulles moi preto.
Así que estes rapaces que cantan como os anxos e son solidarios a tope estarán na sétima edición de Festival 27373 de música en galego.

Cuarta Xusta

O seu lema musical é “Berrar con música as inxustizas que nos rodean“, así que o rock combativo e social chega este ano da man do grupo de Melide, Cuarta Xusta.
O grupo xorde a comezos do ano 2016 como resultado da paixón pola música dos seus integrantes, comezan a súa andaina versionando temas de grupos coñecidos e sobe por primeira vez ós escenarios no Festival Presume de Galego do mesmo ano, aínda que neste momento os instrumentos que se atopaban na banda difiren dos da actualidade, xa que as guitarras eran acústicas e non había nin baixo nin batería.
Foi a partires deste momento cando o grupo comeza a traballar para compoñer temas propios que parten das inquedanzas que afectan á nosa sociedade e sempre na nosa lingua. Ademais disto, tamén comezaron os cambios a nivel instrumental introducindo xa batería. A finais deste mesmo ano prodúcese outro gran cambio a nivel instrumental coa introdución de baixo e cambiando as guitarras acústicas polas eléctricas.
No 2017 a banda segue a súa andaina musical participando en festivais como o Kurrala Rock, así como dando concertos varios e compartindo escenario con outros grupos do panorama galego como Superoito ou Zënzar, cuxo vocalista interpretou un tema con Cuarta Xusta no Festival Presume de Galego. A finais deste mesmo ano comeza a preparación para a gravación do seu primeiro traballo discográfico Un novo espertar, a cal se levou a cabo durante o mes de xaneiro do 2018 en Arzúa por Paco Cerdeira. Este foi presentado o 10 de marzo e inclúe oito temas propios que seguen unha marcada liña social e conta con grandes colaboracións do eido musical galego.
Cuarta Xusta son Aida López (cantante), Marta Sánchez (guitarra e violín), Lúa Aguete (batería), Alberto García (guitarra) e Alba Vilariño (baixo) e veñen a presentar o seu primeiro disco “Un novo despertar”.

Berta Franklin

Sempre intentamos dar cabida a grupos preto de Begonte, ben da Terra Cha ou de Lugo, pero si un dos compoñentes é de Begonte xa non hai discusión. Se ademais ese compoñente é Marcos Vigo (o deseñador do 27373) e ademais forma parte dun grupazo como este, non había ningunha dúbida de que Berta Franklin tiña que estar nesta edición do Festival 27373.
Berta Franklin é unha banda Luguesa que fusiona soul e rock como principais elementos de inspiración pero sen pechar portas a ningunha influencia e intentando ser orixinais á hora de crear. Melodías harmoniosas,sons moi coidados e detallistas na produción. O idioma nas nosas letras é o galego sendo así este un motivo máis de ilusión por facelo grande e elegante. As letras tratan de relacións persoais dende un punto de vista escuro e íntimo. A posta en escena é moi coidada e o son, potente pretendendo ser unha experiencia para o espectador en todos os sentidos tanto visual coma sonora.
Berta Franklin son: Marcos Vigo (voz e guitarra), Jesús Iglesias (guitarra), César López (baixo), Simón Cuba (batería) e Juan Castro (teclados) e veñen a presentar o seu primeiro EP que podes escoitar de balde na súa páxina en Bandcamp.


Deixar un comentario

Festival de noite 2017: Airiños da Freba


Os Airiños da Freba, ou na súa versión máis ampla como Frebudos/as, xa pasaron polo noso festival hai un par de anos. Naquela ocasión, amenizando unha sesión vermú inesquecible.

Airiños da Freba fundouse no ano 2012 como asociación cultural e grupo musical coa fin de investigar e divulgar a música tradicional da provincia de Lugo, inspirada nos cuartetos, quintetos e pequenas orquestiñas que animaban as nosas festas nos anos 40 e 50. Nesta actividade de investigación e búsqueda do contacto directo con músicos tradicionais coñecen e descubren un boa parte do repertorio de gaiteiros da provincia de Lugo, pezas pensadas para sacar á xente a bailar e gozar dunha verbena á galega.

O grupo está formado por Rebeca Tallón ao bombo con pratos; Victor Manuel Villamor, á gaita; Luis Quintana ao saxo soprano; José Antonio Rodríguez, Josiño, ao clarinete; José Manuel Díaz, Barbeiro, ao acordeón e Daniel Carballo, Maka, á voz e percusións.

Estes últimos meses o grupo ten unha actividade frenética polos torreiros do País presentando o seu recén estreado traballo “O’de Lacón“. Un traballo fermoso para botarse a bailar no torreiro no que van convertir o escenario do Festival 27373.

Co seu recén estreado videoclip, O estraperlista, deixamos o repaso ao Festival 2017.

O ESTRAPERLISTA from MT Producciones on Vimeo.


Deixar un comentario

Festival de noite 2017: Young Murajazz Big Band

Vai ser a primeira vez que o jazz soe nos escenarios do Festival 27373. Se cadra, é un estilo complicado de axustar dentro dun festival de música en galego, pero sendo esta banda xuvenil un dos escasos exemplos deste tipo de formacións en Galicia e estando formada por xoves da contorna, houbo poucas dúbidas de intentar traer a Young Murajazz Big Band ao Festival 27373. Esas poucas dúbidas desapareceron, completamente, ao escoitar a esta banda en directo, cun son rotundo e unha escolla de pezas moi axeitada.

A banda xuvenil xurde dentro das Escolas de Música de Rábade, Begonte e Outeiro de Rei, no ano 2014. Trátase da primeira formación luguesa formada de xeito íntegro por mozos e mozas intérpretes, completando así a formación clásica de Big Band. Pese á súa breve traxectoria, xa ten actuado en diversos festivais, como o veterano Festival de Jazz “Cidade de Lugo”, en diversos concellos da provincia, reiteradas celebracións do día Mundial do Jazz, cursos de improvisación e dentro do programa Musiqueando, da Deputación Provincial de Lugo, obtendo gran éxito entre o público. A Música que interpreta a banda, dirixida por Álex Troya, vai desde o swing máis clásico ata versións de temas moi coñecidos do noso tempo.


Deixar un comentario

Festival de noite 2017: Ezetaerre


En xuño de 2015, tres mozos que estudaban Ciencias da Comunicación na Coruña xuntáronse para facer un rap contra a fusión de facultades na Coruña, a cousa seica funcionou e de aí xurdiu a idea de montar un grupo: Ezetaerre, formado por Garchu (Miguel García), Pirola (Juan Pirola) e Petrowski (Pedro Iglesias), levan unha curta traxectoria pero dando axiña moitos pasos importantes. Unha maqueta en 2016, gañan o III Premio Revenidas de Música Emerxente e tocan no Festival ese mesmo ano e en 2017 sacan o seu primeiro disco co título “Aspiracións mínimas e urxentes“, facendo historia na música galega ao sacar, á vez, un disco e os vídeos que acompañan a todas as cancións.

Ezetaerre fai un rap loitador e combativo, en galego e reivindicativo. Veñen ao Festival 27373 a presentar o seu primeiro traballo e o Festival volve a recuperar o xénero do rap desde aquela primeira edición onde Os labregos conquistaran Begonte.

Aí quedan un par de pezas, o primeiro o jit da tempada, un lema co que coincidimos plenamente, Non é verán de Estrella Damm; o segundo, o tema titulado A herdanza do tempo.


Deixar un comentario

Alá foi a quinta edición…

Despois duns cantos días de merecido descanso voltamos para facer un pequeno resumo do acontecido nesta quinta edición que, para moitos dos que estivemos alí, foi unha das máis bonitas. Se cadra o estilo deste ano, potenciando as actividades de día e facendo os concertos máis cedo e noutro formato máis pequeno, pero tamén, moito máis cercano, sexa o futuro do #Festival27373.
O día foi perfecto, con moita calor, pero que a carón dese río Ladra e nesas instalacións espectaculares do Club Fluvial de Begonte foi moi levadeiro e daba gusto gozar dos postos de artesanía e das asociacións que se achegaron para presentar os seus proxectos e as mulleres de Bolboreta Fiandeira xa estaba coas súas demostracións de fiado, que duraron todo o día.

Festival27373-26 Festival27373-25

Festival27373-34

Pola mañá o cuarteto Pingarela, grazas ao programa Musiqueando da Deputación de Lugo, amenizou a sesión vermú, que foi máis “beermu” que nunca. Coas súas xotas, pasodobres e muiñeiras puidemos gozar dos catro estilos diferentes de cervexa artesá que trouxo para o festival Cervexas Aloumiña.

Festival27373-2 Festival27373-5

Despois do xantar, o V Aberto de Billarda acaparou moita atención e houbo unha grande participación, levado de xeito impecable polo compañeiro billardeiro, Victor Chousa. Os gañadores foron Victor Chousa, Xan de Madialeva e Chousa pequeno. Agradecer a Cervexa Artesá Aloumiña e a Panadería Chairega a súa achega para os premios.

Festival27373-36 13921161_905038119640376_910483132346861998_n

Case á mesma hora tivemos ocasión de gozar co grandioso espectáculo de  Desastronauts, acrobacias no aire, xogos con lume e unha historia de amor/desamor nas alturas. Un auténtico luxo poder contar con este dúo no festival.

Festival27373-41 Festival27373-42

Á tardiña, comezou o Festival de noite. Abriron Habelas Hainas, catro mulleres bravas e comprometidas que deron unha lección de compromiso e calidade. Para este que escribe, un pequeno sono cumprido (¡¡grazas mozas!!)

Festival27373-49 Festival27373-51

Sinónimo de festa

e de compromiso tamén,

non deixamos de bailare

con Tanto Nos Ten“.

Festival27373-12 Festival27373-11

E de remate, o inclasificable e único Leo i Arremecághona que deu un concerto e unha actuación inesquecible.

Festival27373-19 Festival27373-17

Para rematar, queremos agradecer a todos os socios e socias de Castiñeiro que traballaron arreo para organizar este Festival e que ese día botaron dúas mans para que todo saíra o mellor posible, somos poucos, pero somos bos e xenerosos. Aos nenos e nenas que estiveron todo o día vendendo produtos de Castiñeiro, fixeron unha labor impresionante e cada vez están máis implicad@s no festival, son a semente. A todas as artesás que lle dan vida e cor ao Festival (algún incluso desde Andalucía), sen as vosas creacións e as vosas gañas, non sería o mesmo. Ás dúas asociacións que viñeron a explicar os seus proxectos, Semente Lugo e Fundación Manuel María, un orgullo a vosa presenza. A Victor Chousa por todo o que traballou para sacar adiante o Aberto de Billarda. A Panadería Chairega e Cervexa Aloumiña, por contribuír aos premios da billarda. A todos os grupos e artistas polo seu bo facer e por intentar facilitar as cousas todo o posible, igual que aos técnicos de Escóitame e Fábrica de Sons. A Alquifer Ceao e Lito. E, por suposto, ao Club Fluvial de Begonte por deixarnos esas marabillosas instalacións. Tamén á parte institucional, o Concello de Begonte e a Deputación de Lugo. E por riba de todo, a toda a xente que vos achegades ata o noso/voso Festival, grazas por vir.
Esta edición rematou…en breve, a traballar na sexta edición.

¡¡Viva a nosa cultura, viva a música galega e viva o #Festival27373!!

 

PD: como sempre nestes casos, agardamos non termos esquecido de ninguén. Se así fora, pedimos desculpas sinceras.

Todas as fotos pódense ver na seguinte ligazón: Fotos da V edición do #Festival27373


Deixar un comentario

Festival de noite 2016, Tanto Nos Ten

 

Con case dez anos andando de foliada en foliada, de festa en festa, chegan desde Redondela para encher de boa música e ambiente festeiro o escenario do 27373, non se nos ocorre mellor xeito de rematar o festival que facelo con Tanto Nos Ten.

Nas súas propias palabras, Tanto Nos Ten, defínense como “un grupo de música da Galiza que empregamos no noso repertorio músicas e letras propias e do saber popular, retranqueiras, de escarnio e comprometidas co país, e que, xunto aos pasodobres, muiñeiras, foliadas, rumbas e outros ritmos bailables, conforman o que denominamos, música tradicional furtiva coa que tratamos de interactuar coa xente, e converter nunha festa cada unha das nosas intervencións, tanto de rúa como de palco”.

Os integrantes do grupo son: Natalia Gómez (pandeireta, cunchas, voz); Manuel Cruces (gaita, frautín e voz); Alvaro Cardalda (acordeón e voz); Josinho da Teixeira (tambor, voz e parrafeos varios) ; Xurxo Terrible (clarinete, gaita, requinta e voz) e Lucía Lorenzo (bombo e voz). Teñen dous traballos publicados Tanto Nos Ten e Entre Néboas.


Deixar un comentario

Festival de noite 2016, O Leo i Arremecághona

Hai case vinte anos que un tal Leonardo Fernández pasa a converterse en O Leo, unha personaxe vital dentro do panorama da música en galego. O Leo é cantante, pero tamén actor, poeta e home espectáculo. As súas presenzas no escenario son algo máis que música, cun humor negro e unha retranca envexable é capaz de facer unha disección da realidade que nos toca vivir, facendo versións de coñecidos temas ou temas de creación propia, con innumerables cambios de rexistro, vestiario ou estilos. O Leo é un tipo inclasificable, o mesmo que a súa música e o seu espectáculo. De seguro que non vai deixar a ninguén indiferente.


Deixar un comentario

Festival de noite 2016, Habelas Hainas

É no 2009 cando se cruzan os camiños destas catro mulleres de ampla traxectoria no mundo da música tradicional, para crearen o proxecto “Habelas Hainas”. Coas mesmas inquedanzas musicais e vitais, forman un quebracabezas onde os catro elementos se xuntan e complementan de xeito persoal.

Compostela é o decorado onde se dá a luz o proxecto que, dunha forma directa, conecta coa xente de a pé en rúas, calexas, prazas, locais e escenarios. O seu punto de partida é a música tradicional e de raíz, sentíndose parte dunha tradición longa e viva da que xorde a natural necesidade de expresárense, sempre dende unha ollada feminina e plural. Isto lévaas a explorar outras músicas, crear os seus propios temas e experimentar coa tradición. Esta permanente inquedanza reflíctese na indagación e aproveitamento dos diferentes recursos dos instrumentos tradicionais, creando un son enérxico, fresco e orixinal.

Arantza Alfaia (tamboril, bombo, darbuka, caixón flamenco); Jara Ortiz (voz, bombo, pandeireta, crótalos árabes); Patricia Gamallo (gaita, saxo alto, pandeiro) e Sandra Tamayo (acordeón, gaita, pandeiro), catro mulleres loitadoras e bravas, comprometidas coa defensa cultural do noso país, coa defensa dos desfavorecidos, loitadoras pola igualdade, feministas e grandes artistas. Foron o primeiro cuarteto feminino en tocar no Entroido de Hío e teñen actuado en case todos os grandes festivais deste país: A Chaira, Terra Brava, Antrospinos, A Rebusca, Festigal, Pardiñas… Por fin, van tocar no 27373, un deses grupos que sempre estiveron na nosa mente para tocar en Begonte, un soño cumprido.